( بإسم الدين باكونه الحراميه )
أريد اليوم أبدي وياك من بغداد
تأريخ العروبه وكعبة الامجاد
أدري بيك مأمور بأمر الأسيد
وأفعالك تره كله ضبابيه
وبأسم الدين باكونه الحراميه
~~~~~~~~~~~~~~~~~~~~~~~~~~~~~
هاي الناس كله مدولبه وتلوب
وأحوال البلد دا تمشي بالمكلوب
يا خير إلإجانه والنفط منهوب
ومشاريعك صفت اكثره وهميه
وبإسم الدين باكونه الحراميه
~~~~~~~~~~~~~~~~~~~~~~~~~~~~~
إنطيني وزاره تفيد هاي الناس
شهر و إثنين تلحك تعلن الإفلاس
من هاي الحكومه والله شاب الراس
وقرارات البلد أصبحت كرديه
وبإسم الدين باكونه الحراميه
~~~~~~~~~~~~~~~~~~~~~~~~~~~~~
شيفيد التظاهر بساحة التحرير
هاي الناس طلعت تطلب التغير
صدك وإعتقد كلشي ابد ميصير
إبتلينه وما بعد منه خلاصيه
وبإسم الدين باكونه الحراميه
~~~~~~~~~~~~~~~~~~~~~~~~~~~~~
هاك أخذ المدارس وأنظر التعليم
تلكاهه صفر لو تدخل التقيم
هوسه وطربكه ماكو أبد تنظيم
ودراستنه ابد ما بيه علميه
وبإسم الدين باكونه الحراميه
~~~~~~~~~~~~~~~~~~~~~~~~~~~~~
شنحجي والفقير بهمه كام يموت
ما عنده عمل لأطفاله ماكو قوت
لا حصه بقت ما عنده بس الصوت
مات إبن البلد و عاشت اللوكيه
~~~~~~~~~~~~~~~~~~~~~~~~~~~~~
تعال إنظر إلصحه وشوف بيه شصار
تعامله ودواهه صار بالدولار
لو طاح الفقير بأمره ضل محتار
و لو مات الجنازه تبقه رهنيه
وبإسم الدين باكونه الحراميه
~~~~~~~~~~~~~~~~~~~~~~~~~~~~~
إلسياسي اليوم يذبح بالفقير
وعقارات البلد أخذوه بالتزوير
دمروهه البشر بالذبح والتهجير
كل هذا وبعد تفجير يوميه
وبإسم الدين باكونه الحراميه
~~~~~~~~~~~~~~~~~~~~~~~~~~~~~
ذبحونه الجماعه بقصة إلتهميش
خل نبني وطنه ونترك التفليش
أخوه بهل البلد خلونه بس نعيش
وخل نبني العراق بغيره عربيه
وبإسم الدين باكونه الحراميه
٢٦ / ٤ / ٢٠١٦
ليست هناك تعليقات:
إرسال تعليق